Yup Mang Ni A Ning Gam (snr) Shakrep Mungdan de jahkring mi.

Shana hkying 10:00PM hta Singapore Mungdan, Golden Mile Complex e gumhpraw galai kyin bu si nga ai. Ngai Ta Tut, Singapore kaw na Malaysia de jahkring mi sa chyai na matu mawdaw daru Golden Mile e Singapore gumhpraw Dollar hpe Malaysian gumhpraw Ringgit de galai nga ai. 10:30PM hta le na mawdaw lekmat mari lang let mawdaw rawt na ten hpe la nga sai. Nau n-na ai sha maw daw rawt mat wa sai hte jahkring mi nga yang Malaysia Mungdan de shang wa na Mahkrai pawt de du wa ai majaw maw daw kaw na yu let Maigan masha pru shang gawn hkang dap (Immigration) de shang ai.

Ndai mahkrai lai sai hte Malaysia mungdan de shang sai ngu myit nga ai. Hpa mung n hkrit n tsang ra ai sha Malaysia hkran de du wa sai. Shana re ai majaw ngai Ta Tut wa mung yup malap mat let maw daw n tsa e yup mang she mang hkra hkan mat sai. Hkying kade na mat ai n chye, lam n tsa e kade lang hkring lai mat ai n chye dat ai sha Malaysia Mungdan a mare daju Kuala Lumpur (KL) mare kaba hta jahpawt hkying 3:30AM hta du mat sai rai nga ai. Yup su yup mang rai, ti nang a n hpye hpe hta gun let Maw daw shap (Taxi) lang nna jinghku ni a dum n-ta hkring dat hpe jaw let jawn mat wa sai. Du ai hte jinghku ni hkap tau la nna shara jaw ai hte kalang ta yup pyaw mat sai.

Yup nga ai ten gaya gayoi nga wa ai majaw mahkyit chyu mahkyit sai hte jahpaw du yang chye dat ai gaw Shakrep grai kawa ai nga ai hpe tsun dan ma ai majaw Shakrep kawa katut ai hpe chye lu ai hte kawa hkam da ai shara hkan e mahkyit chyu mahkyit nga sai re. Hpa mi nga tim an-hte Jinghpaw Wunpawng sha ni sha n ga Myen mungdan hta jam jau let lu na sha na bu na hpun na yak hkak ai ni yawng mayawng gaw n dai shara hta sa zup let ti nang a shawng lam hpe Mungkan Hpung (United Nations) de ap da ai shara hte shawng lam a yup mang ni de du wa na matu ning gam langai mi rai nga ai shara hta n-dai zawn hkap tau la na jinghku jingyu ni lu ai majaw grai kabu ai.

Kadai mung kade a kan bau lam hte ti nang a sak hkrung lam a matu shakut shaja nga ra ai n dai shara ni hta Jinghku manam ni hpe grai hkap la kam ai gaw an-hte Jinghpaw Wunpawng sha ni sha rai na re ngu ngai Ta Tut shadu ai. Gara mungdan, mungkan de du mat ai rai tim ti nang a ru sai, htung hking, myusha hte Mungdan hpe n malap ai Jinghpaw Wunpawng sha ni rai nga ma ai ngu ngai Ta Tut a rawng la let myit dik ya nga ai. Ti nang a Mungdan, buga ni hta nga lu nga sha na lam yak hkak ai majaw du sa wa ai n dai shara ni hta e lu sha na lam, nga na lam ni gaw grai yak hkak la nga ai. No. 3 Mungdan kaba ni de lu du na matu n dai shara ni hta e byin mai ai hku nga ra ai prat ni gaw grai pu ba la nga ai hpe mung mu lu ai hku re.

Ndai shara de ngai Ta Tut 2008 ning hta mung kalang mi du ga sai hte ya mung shai mat ai lam n nga ai sha, moi na hte maren rai nga ai hpe mu ai. Masha ni kade shang, kade pru, kade galai mat ai rai tim n dai shara hkan nga ai masha ni yawng a mang hkang ni gaw n galai shai nga ai. UN cards rai n lu la shi ai ni mung dai lu la hkra shakut nga ai hte shing gan mung n le gwi hkra hkrit nga ai ni mung nga ma ai. Nga ai shara n-ta kata ni hta e masha a sai hpe chyup chye ai Shakrep ni grai nga ai zawn shing gan de mung masha a sai, ja gumhpraw ni hpe chyup chye ai Shakrep ni grai nga ai lam hpe Malaysai nga Jinghpaw Wunpawng n kau mi tsun dan ai majaw chye lu ai.

Ngai Ta Tut n dai laika rau ka shaleng dan ai hta ta tut hkam sha nga ai mabyin ni gaw grau jam jau la nga ai. Bu hpun lu sha na lam ni a matu ti nang a Mungdan e n galaw ga yu ai mayam bungli ni hpe myit kaji let sha galaw sha ra ai. Malaysia masha ni a masha zawn n nawn ai hku tsun shaga ai lam ni hpe mung kam sharang ra nga ai. Hpa lam mi byin wa ai rai tim masha ni hte shadawn yang galoi mung baw gum let sha hkawm sa ra nga ai. Masha wa hpe hpa mara n galaw da ai rai tim Balik (Police) hpe mu ai hte lagu lagut rai hkawm sa ra ai lam ni gaw grai jam jau la nga ai. Pandung ngu ai mungdan kaba ni a shaga ai lam ni hte ndai zawn re ai prat ni hta na lawan lawt lu na matu sha kyu hpyi shaja nga ra ma ai.

Shana yup ai shaloi, sai chyup chye ai Shakrep ni gaw n hkring n sa masha a sai hpe shara shagu kaw na gawa chyup shaw la ai zawn Malaysia kawna Balik ni hte bungli madu ni mung jam jau la nga ai myusha ni kaw na ja gumhpraw, n gun a tsam, a ten hte sai ni hpe chyup saw la nga ma ai. Kadai hpe hkrum tim shi hte shi gaw jam jau ai mau mwi ni hpe hkai dan lu ma ai. Madat sha madat tim mung n shung si she rawng rawng nga hkra chye na myit sawn la lu ai. Mungdan a ning baw ni nan mung ndai zawn ti nang hpe kam hpa let sa machyu nga ai jam jau masha ni kawna sai chyup lu ai lam ni nga ai. Rim la lu ai masha ni hpe dut sha ai lam ni, gumhpraw a grip a rip rai hpyi ai lam ni, roi ai lam ni gaw a hkying ten shagu, shara shagu, masha shagu hta hkam sha, byin nga ai lam ni rai nga ai.

Ngai Ta Tut lahkawng ya sha sa shanu ai shaloi Shakrep grai kawa hkam la ai zawn shani shagu nga pra ra ai Jinghpaw Wunpawng sha ni kade wa hkam sha na hpe chye na lu ai. Jahkring mi sha hkam sha lu ai pyi grai jam jau ai zawn nga kam sha let n lu hkam jan lu ai majaw, shawng de kaw na nga let galoi mung sai chyup hkrum nga ai ni gara hku hkam sha nga na ngu ai gaw Ta Tut mung n chye tsun mat sai. Htaw ra kaw Balik ni masha rim ai da, n dai kaw gaw rim mat sai da, kadai kun gaw dut sha hkrum sai da, kadai kun hpe gaw bungli madu ni a dup gayet ai da, bungli shabrai n jaw ai da nga ai, da ni grai law hkra hpe mung na lu, chye lu, mu lu ai majaw grai myit n pyaw ya ai.

Kaning re ai sak hkrung lam, gam maka ni hta rai tim pyaw ai lam ni hpe chye tam, mu tam let galaw lu ai an-hte Wunpawng sha ni a atsam hpe gaw ngai Ta Tut mung grai shagrau mayu n ngai. Jinghpaw Wunpawng sha ni a Nawku jawng nga ai, Christmas, Shaning N nan, Chyeju dum poi ni hpe mung galaw ma ai. Myit pyaw hpa poi lamang ni hte htung hkying ni hpe gara hku mung n lu kabai kau ai an-hte Jinghpaw Wunpawng sha ni a rawn a lai ni hpe mung grai shagrau ai. Ya ngai Ta Tut du nga ai ten hta mung Hkung ran poi lahkawn hpe galaw nga ma ai. Ngai Ta Tut kalang mung n chye hkat ga ai, n mu ga ai rai tim Hkung Ran poi hta sa shang lawm lai wa sai.

Shadang Bawk Di hte Shayi Htang Htoi yan a Hkrisatan dinghku n nan de ai lamang hta ngai sa shang lawm ai re. Jinghpaw Wunpawng buga hte kade tsan gang nga ai rai tim ti nang a htung hking hpe n malap kau ai sha hkung ran bu hpun palawng ni hpe Jinghapw soi palawng, n hpye, n htu n nga, ni hte grai tsawm htap hkra mu lu ai. Chye hkat ai mi rai yang rai, n chye hkat ai mi rai yang rai manyi sum sai rai yawng hpe hkap tau let chyeju dum ga hpe n hkring n sa let tsun shaga nga ai Num n nan, La n nan yan hpe mu lu ai. Yawng hpe tsaw ra myit hte hkap tau chyeju dum nga ai zawn shan a Dinghku n nan mung yawng a kyu hpyi ga hte maren ngwi pyaw ai hkrisatan ding hku byin tai lu u ga ngu ngai Ta Tut mung kyu hpyi lawm ya n ngai.

Malaysai Mungdan e du nga ai Jinghpaw Wunpawng sha ni a myu tsaw myit gaw Wunpawng buga e naw ngam nga ai ni hta n grau tim n yawm na re ngu ngai Ta Tut shadu n ngai. Hpa lam hta rai tim ti nang Jinghpaw Wunpawng sha ni hte rau rau rai galaw ai lam ni hte yawng myit hkrum nga ai hpe yu yang chye lu na re. Kadai mung kade a myit masin kata hta e ti nang a buga Dum N-ta hpe myit dum nga na re ngu mung myit sawn chye na ya lu ai. Ti nang a shawng lam sak hkrung lam hpe Dum N-ta buga e nga ai hta grau rawt jat na ngu sawn lu ai majaw n dai yup mang ni a ning gam langai mi rai nga ai Malaysai Mungdan e sa jam jau hkam nga ai rai tim myit kata e gaw ti nang a buga de she du nga ai ni mung grai law nga ma ai.

Ya Malaysia kaw na Singapore Mungdan de bai wa ai lam n tsa e ngai Ta Tut a myit kata Shakrep gawa hkang ni gaya nga ai zawn myit sawn sum ru yu na lam ni grai law hkra ngam nga sai. Grau kaja ai prat yup mang ni a matu ning gam langai mi gaw Shakrep ni hkrai zing ri nga ai Shakrep Mungdan she rai nga ai hpe ta tut sa mu hkam sha lu ai. Ndai yup mang ni a ning gam langai mi hta Shakrep ni sai chyup la ya shagu ti nang hkrap let myit kaji nga ai hta Kanu Wunpawng Buga gaw grau myit n pyaw let masin machyi nga ai hpe nang chye yang ti nang ra ai pandung du ai hte lawan ai hku Kanu buga de bai wa rit ngu...

Matut hti na+++

Bai hkum ba da na---

Jeju n dep ai

July shata re ai majaw rai sam ai, marang jahkring hkring htu ai majaw shingan de hkawm sa na matu yak hkak ai hku re. Dingdung Korea Mungdan a Dingdung maga de panglai n-tsa e nga ai Jeju-do zinlawng gaw tsawm htap la ai majaw sachyai na matu grai mying kaba ai shara langai mi rai nga ai. Ndai Jeju-do zinlawng gaw Korea Mungdan hta kaba dik htum zinlawng rai ai sha n ga, Korea Mungdan a lak lai dik htum ti nang shara ti nang up hkang Asuya, Special Self-governing Province, rai nga ai.

Ndai Jeju-do zinglawng n tsa e mare kaba 3 nga ai hku re. Panglai hka mung san tsawm la ai hte grai tsawm ai hka hking gau ni lu da ai majaw mung maigan hkawm sa masha ni myit shang sha ai shara langai mi rai nga ai. Jeju zinglawng gaw Wan Bum (Volcano) kapaw ai kaw na byin wa ai zinglawng re ai majaw n lung ni yawng a chyang (Black) n sam hkrai rai nga ai.

Jawng dat ai majaw galaw hpa n nga mau nga ai ten manang langai mi International Youth Fellowship (IYF) kaw na woi awn galaw ai World Youth Camp nga ai da nga nna shachyen ya ai majaw grai myit shang sa let sagawn yu yang manu mung nau n ma ai sha mai shang lawm ai nga ai majaw grai kabu mat ai. Marai langai mi Singapore Dollar 300SGD bang nna shang lawm ra ai hte nbung li lekmat hpe gaw ti nang jahpu hte ti nang sa ra ai re. Visa hte seng nna mung IYF kaw na lit la ya ma ai majaw mayak mahkak nau n nga ai hku re.

TG Thai International Airway kaw na manu hpa dik n bungli lekmat mari lang let zatka hkan e sha mu ga ai Korea Mungdan de sa du yu sai hku re. Dollar 650SGD htum ai n bungli hkrun lam gaw hkying hkum 5 chyen sha jawn ra ai hkrun lam hpe hkying hkum 9 jan ting jawn kau sai hku re. De a chyeju majaw Hongkong hpe nbung li pa kawn na kaji mi mu ga sai.

Visa shawk ai shaloi na lam hpe naw tsun dan na. IYF kaw na lit la let Visa shawk ya ai rai tim shawng ning le wa ai shiga gaw nkaja la nga ai. Myen re ai majaw visa n lu jaw ai nga korea maigan kyit hkai rung kaw na tsun wa ai majaw grai mau lai kau sai. Myen Asuya a majaw an-hte Jinghpaw ni sari poi ai hku re. Akyu chyu hpyi shaja let dai Korea kyit hkai rung de hkrai sa san san di yang hpang jahtum e visa jaw ya ai hte chyan la chyau rai Korea ga du lu du ga mat ai hku re.

Camp hpe bat 2 galaw ai hte yawng pawng bat 3 Korea ga hpe sin praw sinna dingdung dingda chyam hkra wam kau da sai. Jinghpaw myusha lu tai ai hpe gaw arawng la ai rai tim ti nang Mungdan ti nang nlu up ai a majaw Myen hkrai hkrai shadu ma ai. Sha chyen shaga ai shaloi masha ni hta grau aten la nna sanglang dan ra ai hku re.

Myit hta gaw Myen sha du katut ai gaw si mat ai hta pyi grau nra dum n ngai. Dai majaw maigan manang ni rau hkrum shagu ti nang gaw Jinghpaw Wunpawng sha re ai lam, Myen hte gara hku shai ai lam ni hpe she ba hkra tsun dan ra ai hku re. Mungdan rawt malan lu ra ai lam ni kaw dai mung lawm ai hku re.

Ya Jeju-do zinlawng kaw du ai lam hpe bai matut yu ga. Camp lung ai re majaw Camp maw daw ni rau htaw hkawm, le hkawm rai nna grai wam kau sai. Bum ni, hka panglai hking gau ni, hkai lu hkai sha ai sun ni, jawng ni grai law hkra yu wam kau da sai. Tsawm nga ai. Mying kaba ai hte htap htuk hkra shi hte shi yu pyaw, nga pyaw na zawn rai nga ai.

Camp re ai majaw zup hpawng hpe gaw lani mi 3 lang galaw ai. Zup hpawng galaw ai shara gaw Korea mungdan hte ASEAN mungdan ni hkrum zup let zup hpawng galaw ai shara Jeju ICC gawk nu kaba hta galaw ai re. Dai kaw Myen Mungdan a dawng hkawn jun da ai hpe mung mu lu ai majaw chyan lachyau rai sumla (photo) gayet la ai. Myit hta gaw N htu 2 chyik chyai re ai dawng hkawn hpe n dai kaw mu lu yang kade kaja na ngu.

Tsit tsawm la ai hpun ni hpe bum ni she hpring hkra mu mada lu ai. Htap 6 nga ai Manam Jarawp (Hotel) kaw na yu dat yang panglai hking gau kaw na jahtum n mu lu hkra tsit tsawm ai Jeju zinlawng hpe tsawm htap la ai hku mu mada lu ai. Ndai a majaw mung Maigan masha ni law malawng sa chyai let ndai tsam htap ai lam ni hpe yu myi n gun la ma ai rai sam ai ngu sawn yu ai.

Ngai Jinghpaw Wunpawng myu sha rai ai majaw kun gaw n chye sai. Ndai ram tsawm htap la nga ai shara kaw du nga ai rai tim nye myit hta "Rai tim (But)" ngu ai ga si naw pru nga ai hku re. Ndai tsit sawm ai bum ni, palayang ni gaw Jinghpaw Wunpawng buga e mu ga ai tsit tsawm la ai bum ni, palayang ni hpe n dep nga ai. Myit man lata ai gaw n re rai tim a tsawm yu ga nga yang kaja nan Jinghpaw Wunpawng buga hta n grau nga ai.

Ndai Jeju zing lawng sha n ga, Korea mungdan ting tu ai hpun ni gaw marau hpun hkrai rai nga ai. An-hte Jinghpaw Wunpawnwg Buga e tu ai hpun ni gaw baw hpan hkum ai hte, Kaba ai hte, tsaw ai hte, tsawm ai hte grai law hkra rau tsawm htap nga ai. Palayang ni mung an-hte Jinghpaw Wunpawng buga hpe gara hku n dep nga ai. An-hte a buga grau tsawm la nga ai. Ndai zawn re ai Jeju zinlawng hte Korea Mungda gaw mungkan hta grai mying gum hkawng nga ai.

An-hte a buga hpe n dep ai Jeju gaw Mungkan hta grai mying gum hkawng yang an-hte a buga gaw hpa baw byin nga sai kun? An-hte a buga hta si hkrung si htan hkum ai, Myen mung kata hta sha pyi tsawm htap ai lam hta an-hte Jinghpaw Wunpawng buga gaw masha a myu wa a mtu mying gum hkawng nga ai. Ndai zawn tsawm htap la ai shara ni, hpun ni, bum ni gaw dai ni hten zar lam de du nga sai.

Gumhpraw a rang law law shaw nna hpun ni hpe dut ai, bum ni hpe htu nna lung seng tam ai, Palayang ni hpe htu nna ja tam ai, Hka ni hpe pat nna jak rung jak rai in shachyaw let masha amyu ni hpe dut ya nga sai. Hkye la na gaw kade a lit rai nga a ta? KIO/A a lit kun? Nang a lit kun? Nye a lit wa kun? Kadai hkye la na kun? Gara hku matut byin wa na kun?

Gasan ni san nga na malai ti nang hkum ti nang lit la, manu shadan let myu sha lam yan hta rawt tsap nna yawng hte pawng galaw ai lam gaw mahtai kaja rai na re ngu ngai sha du n ngai.

An-hte a Mungdan hpe kara mungdan mung n dep ai ngu ai hpe matsing let manu shadan, a hkyak la sa wa ga ngu.

Matut hti na+++

Bai hkum ba da na---

Yi sa lam

Yi wa kaw du yang galoi shagu Shing Tawn Pan manam ai baw shadu ai hku re. Woi Maw gin wang kata Sanpai mare sa ai lam n tsa hta nga ai Aung Ja Yang ngu ai kahtawng hta nye Dum N-ta a Yi nga ai hku re. Mak Chyawk Si (Orange) sun hte gayau let bum de gaw yi hkai sha ai re. Myikyina e jawng lung nga ten jawng dat shagu Yi de wa chyai chyai re ai hpe ya du hkra marit nga ai. Yi kaw hkai ai nam law nam lap ni hte shat shadu jaw yang grai sha shang ai. Ban kade sha bang kau ai pyi malap hkra sha ai. Yi wa kaw dung nna yu dat yang Mungkan ting hpe n tsa kaw na yu nga ai zawn nga hkam sha ai.

Jinghpaw Wunpawng sha ni a lam tsun ga nga yang hkrang yi a lam n lawm n mai rai nga ai. Bum ni hpe hkyen, sharaw nat, mam ting rai nna galaw lu galaw sha ai n dai kan bau bungli hpe n galaw ga ai Jinghpaw Wunpawng Dum N-ta myi nga na n sha du ai. An-hte Jinghpaw Wunpawng sha ni a htung kying langai mi zawn rai nga ai ngu mu lu ai. Ya prat e kade lauban mat ai Dum N-ta ni rai tim, sun mari let yi kyen sha ma ai hku re. Hpa majaw nga yang Jinghpaw Wunpawng nga yang n dai Yi a sama hpe gara hku mung n lu hka ai hpe mu lu ai. Mare Kaba de shangai nna mare kaba de nga man mat sai ni hpe gaw n chye tsun ai rai tim law malawng ngu na gaw n dai hkarang Yi hpe marit na re ngu ngai kam ai.

Shaning tup pu ba da ai lam ni hpe November shata du yang Karai Kasang hpe chyeju dum ai chyeju dum poi hta n gun a woi la ai. Mare Kaba de nga ai ni rai tim ndai November shata du yang Chyeju dum poi ni hta Yi hkan e hkai lu hkai sha ai baw Mam, Saba si, Shing Tawn pan, Majap, Bak Hkri Si ni a ga shagawp ni hpe hti, hkrang shala let galaw ma ai re. Dai hte maren ngai Ta Tut a dum nta e mung Yi galaw sha ai hku re. Yi n hkai shi yang N-pun Gu ai shaloi mung hpun hta ai hte tsing magang ai the li hku ding sa ni hpe nat ai lam ni galaw ai hta grai pyaw dum ai hku re. Rai nga ai ba ai baw bungli rai tim ba pyaw ai ngu she tsun ai baw kun n chye mat sai.

Yi de sa yang lam kaw Hting Ka gun let hkawm ai lam ni hpe grai marit ai hku re. Lam kade kaji, kade magaw, kade ja ai hkrun lam rai tim pyaw nga ai. Grai ba nga ai rai tim Yi wa kaw du yang Kum Gyin Si sha na matu myit hta bang dat ai hte rau lagaw ni grai tsang wa ai zawn a lawan sha lagat dat dat re ai. Yi wa hpe bum a tsaw dik htum ai shara hta gap da ai majaw hkring sa ai ten n bung bung ai hpe grai pyaw ai hku re. Yi sa lam hta kadawng grai lung ra ai. Dai ten kadawng lung nna n tsa du yang dai n bung bung ai hpe lu hkam sha na re ngu myit let kadawng grai lu lung ai hku re. Kadawng lung ngu let hpang de bai gayin yu let Ngai grai byin ai ngu myit hta a rawng la ai.

Yi sa lam hta Yi du wa ai shara kaw ti nang a Yi hpe Gai Hpan kum da ai shara ni nga ai. Dai Gai Hpang hpe chying hka n hpaw ai sha n tsa hku lai na matu lakang ni galaw da ai re. Dai lakang hpe lung yang Yi de du sai ngu grai myit pyaw la ai. Yi Wa de du hkra lung wa ra na lam hpe a tsawm n ga law da ai rai tim grai lung pyaw dum ai. Yi Wa de yu wa ai lam makau e hkai da ai Sa Ba Si hpun ni hta a si si nga ai hpe yu let grai myit pyaw ai. Majap si nj si nga yang 4, 5 di nna Yi Wa kaw jap htu htu sha na ngu myit ai ten mung grai law ai re. Jinghpaw Wunpawng sha rai nna kun gaw n chye ai, majap n jap yang shat mai hta jum n lam ai hkrai shadu ai.

Yi sa lam hta ba gaw ba nga ai rai tim Majap jap htu sa ai zawn sha, kade jap tim mu dum pyaw dum nga ai. Yi lam hta kalang lang kashawt kataw ai lam ni nga ai. Rai tim n machyi nga ai, yi de du yang na pyaw hpa ni hpe myit let grai pyaw nga ai. Mare Kaba hta pyaw hpa shara ni de sa ai hta nga yang Yi sa lam gaw grau pyaw la nga ai. Yi sa lam hta myit da ai lam ni hte Pandung nga ai majaw lam num she shang na lam n nga ai. Yi du yang galaw na grai law nga ai. Hpa majaw nga yang Yi e galaw ai bungli yawng gaw pyaw hpa lam zawn nye myit hpe shapyaw ya nga ai majaw re.

Pu ba ai lam ni, myit ru ai lam ni yawng gaw dai Yi sa lam kaw sha hkoi mat mat re ai. Jinghpaw Wunpawng sha lu tai ai majaw Karai Kasang hpe chyeju dum ai hta Yi lu sa ai a majaw mung lawm nga ai. Prat dep jak rai ni, hpaji ni n ra ai sha praw tsawm la ai myit masin salum hte ti nang kan bau na matu galaw lu galaw sha ai bungli rai nga ai. Masu ai lam n nga ai, shing jawng na hpa n nga ai, n ju n dawng na lam hpa n nga ai. Byi wa ai lam yawng gaw tsaw ra ai lam, pyaw ai lam, myit dik ai lam ni hkrai pru wa ai shara Yi sa lam hpe grai dum ai hku re.

Rai tim ya ten dai Yi sa lam hta tsa sam Myen Hpyen dap ni dung let Yi sa lam e an-hte Jinghpaw Wunpawng shayi sha ni hpe roi rip sat kau ai lam ni nga ai majaw pyaw la ai Yi sa lam ni gaw hkrit hpa lam ni she tai wa sai. Ngwi pyaw simsa let myit ru myit tsang lam hpa n nga ai n dai Yi sa lam ni hpe kaga a myu sha ni madu sha nga masai. An-hte a ji woi ji wa ni kaw na ngwi pyaw let nga pra wa ai n dai Yi sa lam ni hpe bai a dawt gasat la let pyaw la ai Yi sa lam hpe kalang bai hkawm mayu n ngai.

Yi sa lam, ngai du hkra bai wa na n ngai.

Matut hti na+++

Bai hkum ba da na---

Hkrit ai majaw (reason)

Bungli langai mi hpe galaw ai hta shi hte shi majaw (reason) hte shi nga ai hku re. Kan si ai majaw shat sha ai, yu hkraw hkraw' ai majaw hka lu ai, sak hkrung ra ai majaw n sa sa ra ai, kan bau ra ai majaw jagum hpraw tam ai. Lam shagu gaw shi majaw hte shi byin nga ai hkrai rai nga ai. Laika hpaji sharin ai, masha man hta myi man pa na matu, rawt galu kaba wa na matu rai nga ai. Masha n kau mi gaw ti nang galaw nga ai bungli hpe masha wa e a grip a rip rai galaw shangun ai majaw n kam tim matsun hpe hkan nang shatup ra ai ni mung nga ma ai. Hpyen La ngu ai prat hpe yu yu ga.

Myen hpyen la la ai ni a prat hpe yu dat yang ti nang n kam, lahta na matsun hpe n lu ning le ai a majaw hpyen la la nga ai ni grai law nga ai. Dai hku nga yang "hpyen la she nga ai ni hpa rai nna me dai ram hkrit nga ma ai kun?" nga nna myit sawn yu na lam mung nga ai hku re. Hkrit nga ai hpyen la ni a myit hpe mung n mau ra ai, hpa majaw nga yang hpyen tara hta lahta na matsun hpe n hkan yang si a ri jaw hkrum ai lam ni a majaw rai nga ai. Moi England mungdan e hpyen la langai mi lahta na matsun hte tsa lu shangun ai hpe tsa n lu na matu kanu hpe gasadi jaw da ai nga nna matsun hpe ning le let tsa n lu ai majaw si a ri jaw hkrum ai lam Mungkan hta mau hpa langai mi hku na ga ai hku re.

Majaw (reason) ngu ai hta hkrit nna galaw ra ai ngu ai majaw gaw gasadi n dung ai sha n nga magrau grang ai hpyen la byin tai na matu grai yak hkak la nga ai. Laiwa sai 2009, August shata e byin lai wa sai hpu nau Kokang hpyen hpung ni hte Myen Asuya a majan hta Myen maga de na hpyen hprawng hprawng ai masha law la ai hte si hkrum ai hpyen la mung law la nga ai. De a majaw majan hpe lit la ai Myen lit hkam Du Kaba langai mi hpe mara tam dam jaw ai lam ni Myen hpyen dap kata byin lai wa sai hpe yawng chye na re ngu kam ai. Hpa majaw n dai zawn byin ai rai a ta nga yang Myen hpyen la ni a hpyen magam gun ra ai Majaw (reason) gaw hkrit ra ai a majaw rai nga ai.

Hpyen dap, Mungdan (snr) Myusha lam yan ni hta e uhpung uhpawng kata e dai hkrit ai ngu ai Majaw shang wa ai shani gaw hpa bungli mi galaw ai rai tim awng dang na lam hte grai tsan wa ai zawn a rang grai hkrat sum wa ai lam ni byin wa chye ai baw rai nga ai. Hkrit ai majaw bungli hta maju n lu jung ai, hkrit ai majaw bungli hpe kang ka hkra n lu galaw ai, hkrit ai majaw magrau n grang ai, hkrit ai majaw hprawng ai, hkrit ai majaw a sum jaw kau ra wa ai. Ndai lam ni yawng gaw Hpyen dap, Mungdan (snr) Myusha ni hpe jahtum wa chye ai sadi ra dik htum hpyen kaba rai nga ai. Kadai ni hkrit nga ai kun? Kadai wa hprawng na matu myit tawn ai kun? Kadai wa a sum jaw na matu shajin da nga ai kun?

Hkrit ai ngu ai Majaw (reason) hta shi a lam ni grai law hkra naw nga ai hku re. Hpa majaw hkrit ra ai kun? Lahta e kalai wa sai hte maren si na hpe hkrit ai majaw n byin ging ai lam ni byin wa sai Myen Hpyen dap a ladat hpe yu yang kasi la hpa rai nga ai. N gin ai sha ti nang a hpu nau ni law law si jawng ma wa ai hpe mu lu ai. Bai n kau mi gaw masha wa a matu hkrit ya ai ni mung nga ma ai. Ti nang a majaw masha wa hkam sha ra na hpe n kam yu ma ai. Ti nang a majaw dum n-ta masha ni jam jau na, ti nang a majaw jing hku jing yu ni jam jau na, ti nang a majaw a myu sha ni jam jau na hpe n kam yu ai majaw hkrit nga ai ni mung grai law nga ma ai. Ngai mu lu ai ning mu hku nga yang n dai zawn hkrit ra ai lam mung hkrit ging ai lam ni re ngu mu lu ai.

Jinghpaw Wunpawng Mungdan Shanglawt Ausya KIO/A (Kachin Independence Organization/Army) ni a ya hten na masa lam ni hpe maram yu yang dai zawn hkrit ai Majaw (reasons) law law nga ai ngu mu mada ai hku re. N kau mi ti nang sak si hkrum na hpe hkrit ma ai, n kau mi ti nang dum n-ta masha ni a shim lam ai majaw hkrit ma ai, n kau mi ti nan myu sha ni jam jau na hpe n yu gwi ai majaw hkrit ma ai. Dai hku nga yang ti nang hkum ti nang, ti nang a dum n-ta masha ni, ti nang a myu sha ni hpe san yu ga. Nan-hte hkrit ma ai kun? Mungshawa zuphpawng ni galaw ai hta mung shawa ni a ning mu ni hpe tsun tai lai wa ai shaloi hkrit nga ma ai kun (snr) n hkrit ai kun ngu ai mahtai hpe chye lu na masai ngu kam ai hku re. Dai rai yang Myusha ni hkrit nga ai gaw n rai na sai ngu kam ai hku re.

Ti nang a jinghku jingyu ni hte dum-nta masha ni hkrit ma ai kun? Laiwa sai shata ni hta na masa ni hpe yu ga nga yang hkrit nga ma ai hpe mu lu ai hku re. Nkau mi hkrit nga ai zawn n kau mi gaw sadi maja ai lam ni mung nga ma ai. Ndai hta hkrit ai hte sadi ai lam gaw bai shai nga ai. Sadi maja ai ngu ai gaw hkrit ai jaw n rai, shing ma kaw ba da ai ma ti nang hpe n kawa na matu sadi maja ai ga she re ngu mu mada lu ai. Rai tim n kau mi gaw kaja wa nan hkrit nga ma ai hpe mung mu maram lu ai. Majan byin wa na zawn nga yang a kroi a noi nga, mang hkang chyu tam nna a put a pai nga ai lam ni gaw hkrit ai majaw rai nga ai. Dai hku nga yang Jinghku Jingyu ni hte dum n-ta masha ni gaw hkrit ai hte n hkrit ai ni shada Tsa Htam Manga shi hpra rai na re ngu mu mada ai.

Ti nang hkum ti nang san yu ga. Ti nang si na hpe hkrit ai majaw kun? Teng na re ngu kam ai. Ndai mungkan n tsa si na hpe n hkrit ai masha n nga na re ngu kam ai hku re. Mungkan ting hta grau dik htum Karai Kasang a kasha shing tai, Mungkan ga hpe yubak n sin kaw na hkye mawoi la ai Madu Yesu pyi "Ndai gawm hpe ngai kaw na yan kau lu yang yan kau ya rit" nga Kawa Karai Kasang hpang de kyu hpyi ai ten nga ga ai hku re. Islam ni shata shagu mungkan shara magup e si hkam nna bawm kapau nga ai ni rai tim, rai n si shi ai shaloi si na hpe gaw hkrit ma ai. Dai hku nga yang gaw ti nang sak si na hpe hkrit ai majaw ngu mai sawn la sai re ngu mu lu ai.

Rai nga ai Majan ngu ai hpe gaw yawng mayawng hkrit ra ga ai. Masha law law a sak si hkrum wa ra ai zawn Myusha ting jam jau hkrum wa ai baw rai nga ai. Ti nang tsaw ra dik htum ni hpe tat sum wa chye ai. Hpang jahtum ti nang hkum ti nang pyi si wa chye nga ai. Hkrit ra nga ga ai.

Hkrit ra ai hta an-hte Jinghpaw Wunpawng sha ni hkrit jaw ra ai ngu ngai mu sawn lu n ngai. Ga shadawn gawk lahkawn hta maga mi e Hkanghki bang da nna maga mi e lapu bang dai ai hta gawk langai ngai kaw shang ra na nga yang gara gawk hpe lata na rai? Dai hpe myit yu ra ai ngu mu mada lu ai. Re Myen wa hpe gasat yang majan byin wa nna masha law law wa jam jau hkrum wa na rai nga ai. Rai tim lak nak jahkrat kau ai rai yang masha law law sha n ga, ti nang hkum ti nang mung, ti nang a kashu kasha, shu mashi shu masha yaw gaw masha wa a mayam yam ra ai prat de du wa ai baw re ngu mu mada lu n ngai. Hkanghki nga ai gawk de shang na kun, lapu nga ai gawk de shang na kun ngu ai hpe gaw ti nang hkum ti nang nan daw dan yang she mai byi ai baw re ngu mu mada ai.

Myen hpyen wa a n gun gaw law la nga ai. Myen hpyen la ni mung hkrit ai majaw gasat wa na sha re. An-hte mung hkrit ai majaw bai gasat ra nga ga ai. Dai hta shan-hte(Myen Hpyen la ni) hkrit ai Majaw (reason) hte an-hte Jinghpaw Wunpawng sha ni hkrit ai Majaw (reason) n bung nga ai hpe mu chye ra nga ga ai. An-hte hkrit ai gaw ti nang a mungdan the myusha ni mayam yam ra mat na hpe tsang ai majaw, ti nang a n-ta hpe masha wa madu la kau ya na hkrit ai majaw magrau grang grang hpyen wa hpe gasat ra na ga ai. Dai zawn hkrti ai majaw magrau grang, ding man ai hku gasat la ra nga ga ai.

Dai majaw hkrit ai myit hta Majaw (reason) hpe chye lata la let ti nang a myu hte mungdan, ti nang a jinghku jingyu, ti nang a dum n-ta masha, ti nang hkum ti nang makawp maga na matu magrau grang let kangka ai Shanglawt hpyen la ni tai ra ga ai ngu nye a mung masa myi jut hpe garan gachyan dat n ngai rai.

Matut hti na+++

Bai hkum ba da na---

Goi e...

Goi e...

Shaning ni gaw lai she lai,

Ladu hkrum ten ya bai du

Jahkring mi ngu yang dingla wa

Shabrang ngu yang Ah Ji nga

Kashu pyi she lu sai da.

Karai e Kasang e...

Shanglawt lawt ai na sai da

Myutsaw myit ni yawm wa nga

Mung yu ngu yang ding hku yu

Mungdan ngu yang hting ra tam

Myu a matu shakut nga

Hkum hkrang hpum wa ai she mu.

La pai ngu yang la hkra nga

N-gup hta gaw myit hkrum nga

Kadai wa me sa kam na

Jinghpaw ngu yang Wunpawng nga

Wunpawng ngu yang Kachin nga

Jahtawng sha htu tim galaw saw

Gara hku me rawt jat na.

Lata hkindun baw kabye

Hpyen wa hpe she baw gum ya

10 ning jan sai da

Rawt mu Malan mu dai ni hta

An-hte maka an-hte ka

Rawt malan hkring htawng

Bai sha chyaw na

Nang ngai yawng a lit rai nga.

(KIO 49 ning ladu hkrum ai October 25 ya shani a matu ka dat ai gashagawp re. Shut ai lam nga yang mara raw dat ya marit.)

Matut hti na+++

Bai hkum ba da na---

Hkawm nga ai

Hkawm taw nga ai. Hkrun lam kade galu ai re n chye, pandung ngu ai hpe myit masin hta sha dawk bang da nna hkawm nga ai. Kade na sai re n chye, gara kaw na hpang ai re n chye, gara de yawng nga ai re n chye. Myit mada lam gaw chyip she chyap, myit n mu sin praw, sinna, ding dung, ding da gara de re n chye tim hkawm nga ai hku re. Lam woi garum na kadai n nga, n sen mung n na, mungkan ting katsi katsang, ngai hkrai sa kun?

Kalang lang kataw ai ten hta myit daw myit hten mat ai zawn nga hkam sha tim pandung shadaw ngu ai hpe myit hta shaja bang let bai rawt hkawm ai ten mung grai law sai. Grai na sai majaw Lagaw mung grai machyi sai. Rai tim hkawm nga ding yang rai nga ai. Kalaang lang myit kaji wa ai hte hkrit myit ni rawng wa yang n bung sha bung tim hkrit chye wa ai ten ni mung nga ai. Rai tim naw she hkawm nga ding yang re.

Kalang lang grai ba ai ten hkring sa nga yang bai n kam rawt mat na zawn nga hkra myit ba ai. Yup ai kaw na bai n rawt mat u ga ngu kyu hpyi ai ten ni mung nga ai. Shawng lam de na ngai hpe la nga ai tsin yam ni hpe tau hkrau myit chye lu ai majaw grai n kam hkawm sai. Lai wa sai lam ni hpe myit dat yang du wa na ten ni hpe grai n ra sharawng ai. Ndai zawn re ai ten ni hta hpawt de ngu ai hpe grai n ra sharawng wa ai ten ni mung nga ai. Rai tim hkawm nga ding yang rai nga ai.

Kalang lang hkawm na ai ten myit kata hta pandung ngu ai hpe shingran yu ai ten ni mung nga ai. Grai tsawm la ai yup mang langai zawn nga hkam sha tim dai pandung hpa baw re ai hpe n chye mat ai ten ni mung nga ai. Hpraw ai kun? Chyang ai kun? Pyaw ai kun? Jam jau ai kun? Shaman chyeju kun? Tsin yam wa rai sai kun? Ndai yup mang ni a majaw shawng lam nu ai hpe matut hkawm na matu myit shaja let matut hkawm nga ai.

Kalang lang hkring sa ai ten, ngai gara kaw du nga sai kun ngu bai myit sawn yu ai ten ni mung nga ai. Myit kata hta dam lada la ai zai bru jang kaw hkawm nga ai zawn nga hkam sha ai. Panglai n tsa lam dam mat ai masha zawn nga gara de sa na n chye ai sha wam dam hkawm nga ai zawn nga hkam sha ai. Ngai shawng de sa taw ai gaw re ai kun ngu ti nang hkum ti nang san la ai ten ni mung nga ai. Shawng de sa ai kun? Hpang de mahtang hting lut taw nga sai kun? Rai tim hkawm nga ding yang rai nga ai.

Kalang lang sha ra ra hta du yang dai hpe pandung shadu, myit yak ai ten ni mung nga ai. Ndai rai sai kun? Pu ba la ai majaw pandung lawan du mayu ai myit hte dai shara ni hpe pandung shadu, na na wa hkring sa ai ten ni mung nga ai. Rai tim myit hta n kawn jam jau ai lam ni n yawm ai hte myit n dik na shara n nga ai lam ni a majaw pandung ngu ai shara kaja de du na matu bai matut hkawm sa wa ai.

Pu ba la sai. N kam hkawm mat hkra myit htum nga sai. Galoi mi she du na kun? Kadai wa me pandung du hkra lu hkawm na kun? Rai tim hkawm nga ding yang rai nga ai.

Matut hti na+++

Bai hkum ba da na---

Dum N-ta Daw 7 (Hpyen la la ai prat)

"RA NA GAM SENG!"

"DU!"

"LAIKA DU AI SA LA!"

"MAI SA DU WA!"

Du wa hpe salam kau da nna hpang de pai hkra pai kawm let daw dap kaw na pru wa sai hku re. Shing gan du ai hte kalang ta dai laika hpe laika sumbu kaw na shaw hti yu yang nye kanau Ma Kaw kaw na du wa ai laika rai nga ai.

Laika gaw n dai hku rai nga ai,

De,

Hpu ba A Nu grai machyi taw nga ai. Ya hte sha mung tsi rung de 3 ya dang rawng ra ai. Jinghku ni mung yu gaw yu tim nau n kam yu ai zawn zawn rai wa masai. Kanau ni yawng mung myi man gara kaw n da sai. Garum chyu chyu hpyi ai majaw an nau ni hpe hpyi nau n kam hkrum wa masai. Hpu ba nang hpyen la la mat ai a majaw mung n dai jam jau lam ni grau sawng wa ai zawn zawn rai nga ai. A hkun lu yang gaw n ta de shata mi daram naw she wa rit. DC mai shawk ai rai yang mung shawk la nna hpyen la hkum galaw shanu. Ya hte mung gaw yak wa ai hte hpu ba a matu mung tsang ya ra ai majaw kanau ni grai myit ru nga ma ai. Wa Dim mung n ta bai pawng da sai da dai hpe ma naw shaw la ra nga ai. Gum hpraw gara kaw na n lu la lang ai majaw grai myit ru ai. Dum N-ta a matu a kyu n rawng ai dai hpyen la bungli hpe gaw hkum galaw sanu law. Dum N-ta hta nga mu nga mai ai ni a kasha ni she dai zawn hpyen la galaw ai baw re. Ya hpu ba nang n nga yang n dai Dum N-ta hten sana sha re majaw lawan ai hku a hkang hpyi nna wa rit. Hkung ga let,

Kanau Ma hkawn

Baw pungting kaw mu a chye ya ai zawn nga hkra myit ru sai hku re. A ga, hpyen la la ai ngu ai gaw hpa a matu mung n kaja ai rai sam ai ngu she myit wa sai hku re. Hpyen la tai wa ai lam hpe myit yu yang mung ngai kam nna tai ai hku n re sha hpyen lahkawn ai kaw lam sha mat wa ai majaw grai myit n gut ai sha a hkaw a hkang lu ai hte hprawng na hkrai myit da ai hku re. Nye prat prat wa galoi she kam kaja pru na kun nchye ya du hkra hkam sha nga ai jam jau lam ni gaw ladi matu she hkri na zawn zawn nga hkra, hkrap gaw n rai manyi gaw n rai re hkam sha bu si nga n ngai.

Maning 2008 ning, December 23 ya shani, an-hte ni htu sha nga ai Ja maw dabang hta Christmas poi galaw nga yang hpyen sa lahkawn ai KIA hpyen la ni kaw rim hkrum nna Training shata 6 a hkrit nna ya Laiza A Len bum daju e mu galaw nga ai hku re. Ndai hta gaw kam kaja ai ngu na kun gaw n chye sai, Dap Ba 1 hta Training jaw ai rai tim mu gaw Ginjaw de ang ai majaw nau n ba ai ngu yang mung gaw mai tsun nga ai. Gin jaw salang a ra na galaw ai ngu ai gaw hpyen la ni kaw na tsawm ra mi hkyem sa ai baw bungli ngu yang mung gaw mai tsun nga ai. Moi kaw na bungli shaja hkrai hkrai galaw sha wa ai a majaw ya hpyen la prat na bungli ni hpe mung a tsam sha dang galaw ai hku re. A wa a jing hku ni jaw ai bungli hpe n galaw, rai dum ai majaw ja sa htu ai ngu yang kani ya kanoi she tai mat. Rai tim Hpyen la la mat ai majaw kani gaw bai lu je la kau ai hku re.

Shani shagu na bungli gaw Du Wa sa ai de hkan, Du Wa a a rung a rai ni hpe hkrut ya, shat hkyen ya, Du wa gara sa yang gara hkan nang nna ra ai ni hpe galaw ya ra ai hku re. Du jan, shing n rai Du wa a kasha ni nga yang gaw ngai Gam Seng bungli loi hkyem sa ai hku re. Rai hkrut ai hta jan nna kaga bungli ni hpe shan hte galaw ya ai majaw Ra na langai mi hku nna loi gaw hkyem sa nga ai. Shana de rau yang Guard hpyen la ni rau baw lung htawng rai rai re ai hku re. Judy mung Guard ni she bai lit la ai majaw ra na galaw ai gaw tsawm ra hkyem sa nga ai. Du Kaba kaw hkan ai re majaw Jinghpaw mung KIO up hkang gin ra ni de tsawm ra mi chyam hkra lu hkawm sa ai hku re. Myitkyina de manau poi sa ai zawn, Myen ni hte zup hpawng nga ai zawn re ai shaloi gaw PA Du Wa kaw a hkang pyi nna Nu hpe gaw lu gawan wan re ai hku re.

Ngai hkrai wa mi rai yang gaw n dai hpyen la la ai prat hpe grai ra sharawng ai hku re. Magam bungli mung nau n law ai majaw mung rai na re ngu shadu ai. Guard hpyen la ni hpe yu yang shani shagu sinat pai nna RAWT SANA!!! nga ai Guard du wa a n sen na ai hte nang hpa mi galaw taw ai rai yang rai kalang ta si nat pai nna Guard mawdaw de lagat lung ra ra re ai mang hkan ni naw nga ai hku re. Ra na galaw ai ngu ai gaw Du Wa gara sa na nga ai ni hpe mung jau nna tau hkrau chye da ai majaw shajin ai lam ni naw lu galaw nga ai. Kalang lang mu galaw shut yang dam katut ai hta jan nna kaga yawng gaw grai hkyem sa ai bungli rai nga ai. Ra na ngu ai gaw Rank langai mung n kap hpyen dap ting hta nyem dik htum madang kaw mi nga ai rai tim Myu hte Mungdan a matu bungli galaw ai wa re ngu arawng gaw lu mala ai hku re.

Hpyen la galaw ai shata 4 sha na ai rai tim prat mi na sai zawn nga hkam sha ai hku re. Ndai laman Mung masa nau n kaja ai majaw Du Kawa a shim lam a matu Guard sha n rai rung dung hpyen la kaji kaba yawng lak nak hkrak hte majan a matu sadi maja let nga nga ai majaw nau n rau ai hku re. Ndai zawn yak hkak nga ai ten hta Hpyen la ni a myit hta majan hpe sadi ai masha hte la nga ai majaw nga ai zawn n kam nna prawng mayu ai ni mung nga ma ai. Hpyen la n nan galaw ai shaloi ti nang a myit kaji mi mung n lam ai sha shang lawm wa ai rai tim hpyen dap a sharin a chyin ai hte mi chyawm hkam sha mu hkrup ai ma hkrum madup n kau mi a majaw hte mi kawn rawng nga ai myu tsaw myit ni grau grau dan dawng wa ai ni a a majaw hpyen la la ai lam hpe grai a rawng la taw nga sai hku re. Majan ngu ai gaw n kaja ai rai tim myu hte mungdan a matu ngu ai ga baw a majaw nam chyim rawng ai hte myusha ni hpe a kyu jashawn lu ai bungli langai mi re ngu mung mu mada wa ai hku re.

Ya Ma Kaw a laika hpe mu hti ai majaw grai myit n pyaw nga n ngai. Gara hku di na kun? Ndai ten grai ra a hkyak nga ai ten hta she n dai zawn manghkan byi wa ai gaw nye a matu grai lata yak ai lam lahkawng n tsa kaw tsap nga ia zawn nga hkam sha lu n ngai. Hpyen la hprawng wa mi tai mat yang mung Myu hte Mungdan n tsa hka kaba kap ai zawn nga pra tup hkam sha mat na hpe n ra sharawng ai. A hkang hpyi nna wa tim ngai hpa n lu galaw ai hta n ga grau myit n pyaw na lam sha nga ai. Ndai Nu Wa ni gaw de da ai Dum N-ta gaw nye a prat hta htum mat sana hpe mung n ra sharawng ai hku re.

Rai tim Dum N-ta kaji langai mi nga mu nga mai na matu gaw de a Mungdan rai nga ai Dum N-ta kaba ngwi pyaw na a hkyak nga ai. Dum N-ta kaba n nga yang Dum N-ta kaji ni gara hku n nga lu ai ngu ai hpe ngai mu lu ai. Hpun ngu ai n nga yang de n tsa e nga ai U Tsip ni gara kaw n tsip nga ai. Dai majaw U Tsip hpe hkye mayu yang Hpun hpe shawng n kadawng mat hkra hkye la ra na re ngu myit daw dan let laika hpe sinpu kaw bang nna ra ai bungli ni hpe shawoi na hte maren sa galaw mat sai.

Matut hti na+++

Bai hkum ba da na---

Nang, Jinghpaw Wunpawng a gam maka

Kokang gaw daw mi mat mat sai hku re. Moi shawng de kaw na lang wa ai lak nak hte sha jahten kau hkrum ai ga rai nga ai. Ya mung Jinghpaw Wunpawng Mungdan Shanglawt Asuya a daju Laiza de Myen hpyen du ni shiga sa ai zawn zawn rai nna myit jahka ya nga ai hku re. Ndai hpe chye nga ning len dai mahkam kaw hkrat mat mat re ai hpung ni grai law lai wa sai. Nyi dik htum ga shadawn gaw Kokang hpung rai sai ga re.

Ndai bat laman Jinghpaw Wunpawng Mungdan Shanglawt Asuya KIO/A hte Myen Asuya lapran bai gap hkat wa na zawn zawn re ai lam hpe mu lu ai hku re. Jinghpaw Mung kaw na Mung masha law law wa gaw ti nang dum n-ta ni hta e malu masha ni hpe kahkyin ai lam ni mung mu mada ai hku re. Bat mi laman daw dan na n dai bai gap na n gap na daw dan lam gaw gap hkat wa na de mahtang grai madung dat nga ai hku re. Gap hkat wa yang gara hku galaw na?

Majan ngu ai gaw kade a matu mung n kaja ai re. Simsa lam ngu ai hpe sha yawng mayawng ra sharawng ai ga re. Rai tim ya ten hta e Simsa lam n re ai simsa lam a majaw grai jam jau hkrum wa ai hta n sa sa na shara n nga wa hkra byin wa sai majaw bai gap hkat ra wa sana re. Moi shawng de an-hte mu ga na ga ai majan hte gaw n bung sana re ngu kam ai. Myen wa mung shaning law law wa n gun mahkawng da sai hte maren Jinghpaw Shanglawt Asuya mung shi hte shi gaw shagreng da lu sai re majaw gap hkat wa ai rai yang moi na hta grau sawng wa na hpe mu mada lu ai.

Sinat kaji loi li sha kabaw ai baw majan n re ai sha Mungdan kaba ni gasat hkat wa ai zawn rai wa na hte hkrat sum ai lam ni mung kaba wa na re ngu maram lu ai. Awng dam lam kaba lu mayu yang gaw a rang law law bang ra ai nga ai hte maren a rang bang na ten mung du wa sana re ngu shadu ai. Dai a rang bang ai ten hta nang ngai shang lawm lu na a hkyak nga ai. Moi shawng de kaw na ya du hkra myu tsaw myit lam grai jahta wa sai an-nau ni ya ten Myu tsaw myit hpe ta tut galaw sa wa ra na a ten re ai majaw yawng shajin let lu malu n gun a tsam ma hkra hte shakut na a hkyak la nga ai.

An-hte n shakut yang myit mada lam ngu ai n nga mat wa na ra ai. Htawm hpang de na shu mashi shu masha ngu ai gaw n hkoi mat wa na ra ai. Masha a myu wa a mayam prat de prat tup shang mat wa na ra ai re majaw ti nang hta lu ai a tsam ma hkra hte Myen wa hpe hkap gasat shaprawt kau ra na a ten du wa sana re ngu maram lu ai. Ti nang hkum ti nang masha langai sha re ai maw nga nna hkyem sa lam tam yang gaw Kokang hpung ni zawn masha 700 jan ting lak nak jahkrat mat ra ai masa hte bung wa na hku re.

Dai zawn rai mat yang gaw an-hte Jinghpaw Wunpawng myu sha ni a n gun kaba yawm mat na re majaw masha hkum ding dek shakut ra na re. Ti nang hkum ti nang Myu sha lam yan hta manu kade dan ai hpe dum nga ga ngu saw shaga mayu ai. Nang n nga yang Jinghpaw Wunpawng Mungdan n mai de nga ai. Nang grai a hkyak nga ai. Nang sha Jinghpaw Wunpawng Mungdan hpe lu gaw de ai ngu ai hpe sep kawm dum nga ga. Jinghpaw Wunpawng Myusha ni a gam maka gaw nang hte grai seng nga ai. Nang sharawt la yang she amyu rawt wa na re ngu ai hpe dum nga ga.

Jinghpaw Wunpawng Mungdan hte Jinghpaw Wunpawng a myu sha gaw nang shakut ya yang she rawt galu kaba wa na re ngu htet dat mayu n ngai.

Matut hti na+++

Bai hkum ba da na---

Shagan kade hkrat

Aww... shagan shagan,

Nang hkrat yang grai tsawm ai nga ma ai.

Simsa lam a matu nang ap nawng hkra,

Nang hkrat yang grai kam kaja ai nga ma ai.

Sinda hpe kaduk shatai hkra,

Nang naw nga yang grau tsawm ai.

Shana na tsawm n sam ni n hten mat hkra,

Nang hpe shagrau nga ma ai.

Shingra maka a zing ri ai hpe hkam la hkra,

Nang jam jau ai lam kadai n chye ai.

Sinmak ai hpe rawt malan lu hkra,

Shagan kade naw hkrat yang she jahpaw du na.

HKRAT SUM MAT WA SAI MYIT RUM SHARE SHAGAN NI HPE HKUNG GA.. JAW!

(August 10 ya shani ang ai Share Shagan n htoi a matu hkrat sum mat sai Share Shagan ni hpe hkung ga jaw dat n ngai.)

Matut hti na+++

Bai hkum ba da na---

Shawng myit yu u

Kalang mi hta prat dep ai mare langai mi nga ai. Dai mare hta e matsan dum n-ta langai mi hta e Kawa, Kanu, Kasha num sha, shan nu wa ni marai masum nga ai da. Kawa gaw kan bau bungli a matu gaw gap Company (Construction) langai mi hta e bungli shaja galaw ai hku re. Manu shabrai nau n law tim shan nu wa ni sha na sha gaw lu tam ai hku re. Dai wa gaw bungli shaja ga law ai masha re ai majaw tsa hpe galoi mung lu ai hku re.

Bungli ngut jang galoi mung tsa lu nna shi a pu ba ai lam hpe shabran la la re ai majaw tsa ya kaba hku na grai mying gum hkawng ai hku re. Rai tim lani mi hta gaw shi a bungli ngut ai hpang dai shata na shabrai hta loi jan hkra shi hpe shi a company madu wa jaw dat ai majaw grai pyaw nna manang ni rau tsa lu ai loi shajan kau ai. Dai majaw jan du mat ai hte shi mung tsa grai nang mat ai majaw lam pyi n lu hkawm mat ai madang kaw du mat ai hku re.

Dai zawn re nga ai majaw shi gaw shi hkum shi n dang ai hpe chye nna Taxi shaga nna Taxi kaw jawn let shi a dum n-ta hkring dat tsun dan ai hte dai de sa ya rit nga tsun sai. Dai hku tsun let shi a sum bu kaw na gumhpraw Dollar $100 tan hpe Taxi gawt ai Driver hpe jaw ai hku re. Taxi la mung tsun ai hkring dat de du hkra woi wa na matu maw daw hpe hkawm hpang sai. Hpung gaw ni hpe lai, lam n tsa hta grai na hkra Taxi jawn nna lam n she ni kaw shang dat ai hte dai tsa ya wa tsun ai hkring dat de du sai.

Tsa ya wa mung Taxi hkring ai hpe chye ai hte "Du sai i?" ngu san yang du sai hpe chye ai majaw Taxi kaw na yu nna Taxi Driver hpe "Ngai jaw da ai gumhpraw kaw na ang ai hte la nna ngam ai hpe bai jaw rit ngu tsun dat sai. Taxi la wa gaw kalang mi mung n na ga ai ga hpe na dat ai zawn zawn mau mat nna shi hpe tsun ai gaw, "Hkau wa! Nang ngai hpe gara kaw na gumhpraw jaw ai wa mi. Ngai Taxi manu rai n lu shi n ngai. Taxi manu naw jaw rit." nga htan dat ai.

Tsa ya wa gaw grai masin pawt mat ai hte, "Nang ngai hpe tsa ya nga nna roi ai i? Nang hpe ngai Dollar $100 jaw da sai re le. Gumhpraw ngam lawan bai jaw. Ngai hpe dai hku masu yang lu na zawn shadu ai i?" nga nna pawt bang wa sai hku re. Taxi la wa mung shi gumhpraw rai n lu shi ai lam Taxi shabrai jaw na matu hpyi chyu hpyi wa sai hku re. Dai hpang gaw shan lata du mat ai kaw du hkra ga law hkat wa masai.

Nang shut ai ngai jaw ai nga nna htwi hkat taw nga yang makau hku lai wa ai Balik ni mu nna lahkawng yan hpe rim let Balik dap de woi mat wa masai. Balik dap kaw du yang gaw Taxi la wa mung shi jaw ai hku tsun, tsa ya wa mung shi jaw ai hku tsun dan wa sai re. Balik du wa gaw dai hpe na jang tsa ya wa hpe shut ai ngu tsun nna Taxi shabrai mung jaw ra na, hkyuk htawng mung bat mi rawng na hku tara daw dan ya sai.

Ndai hta tsa ya wa gaw grai pawt mat sai hku re. Bat mi tup hkyuk htawng kaw rawng ra, Taxi manu mung bai jaw ra re ai majaw Balik du wa hpe grai n ju mat sai hku re. Hkyuk htawng kaw bat mi rawng ngut ai hpang shi le wa ai shani e shi gaw grai pawt let Jak sau dut ai seng de sa mat wa sai. Shi lu ai gumhpraw rau Jaksau pung mi mari wa nna Balik dap de bai sa wa sai. Balik dap shawng kaw du ai hte dai Jak sau ni hpe shi a hkum hta jaw bun la nna wan hkret hpe shaji let jahtau bu nga ai hku re.

Shi jahtau ai gaw "Balik du wa! Nang ngai hpe n tara ai hku jeyang kau ai majaw ya jang sa tawng ban rit! N tawng ban jang ngai n dai kaw nye hkum ngai nat kau na." nga nna jahtau bu nga ai. Balik ni mung n dai zawn re nna bai sa marawn rawn re ai masha grai law mu ga sai hte shi gaw tsa ya mung re ai majaw majoi tsun nga ai re ngu nna kadai mung a hkyak n la ya ma ai. Dai hpe mu jang ndai tsa ya wa gaw grai masin pawt nga sai hku re.

Kade n na yang shi gaw kaja nan shi hkum shi nat dat sai hte Balik ni mung lagat le wa nna me wan sat garum sai. Tsi rung de du mat sai hku re. Tsa ya wa gaw tsi rung kaw du wa ai rai tim jahtau ding yang rai nga ai. "Ngai Taxi manu jaw sai re! ngai Taxi manu jaw sai!" nga nna tsun jahtau bu nga ai. Kadai hpe mu tim dai hku hkrai hkrai ngu tsun dan nga lu ai hku re. Tsi sara ni hpe mu yang mung dai hku ngu tsun wu ai.

Ti nang hkum ti nang nat la ai re majaw Asuya kaw na mung lit n la ya ai majaw Tsi rung manu hpe ti nang nan shaw ra ai majaw gumhpraw n lu ai shi gaw nta de mahtang wa mat sai hku re. Hkum ting nat katut da ai shi gaw si wa na daram nan machyi sawng nga sai. Shi a madu jan hte kasha yan mung hpa n chye galaw hkrap chyu hkrap nga bu ai. Tsa ya wa chyawm gaw shani shagu lu ai n gun rau "Ngai Taxi manu jaw sai! Ngai jaw ai! Ngai jaw ai!" nga tsun jahtau bu nga ai.

Lani mi gaw Hkristan hkalup hpung sara langai mi gaw dai tsa ya wa a n-ta de sa chyai ai hku re. Hpung sara wa shang wa ai hte dai tsa ya wa gaw "Sara, ngai jaw ai! Ngai Taxi manu jaw sai!" ngu teng man ai lam kaw gwi gwi tsap gwi ai lam hpe tsun dan nga lu ai. Shi hkum shi mung grai a rawng la nga ai hku re. Hpa majaw nga yang ten man ai lam a matu a sak hpe pyi jaw kau gwi ai masha re ai majaw grai myit dik nga lu ai. Dai hte maren dai mare hta mung shi gaw teng man ai lam a matu a sak hpe pyi jaw kau gwi ai la wa re nga nna grai mying gum hkawng nga sai.

Rai tim sa chyai ai Hkristan hkalup hpung sara wa gaw "Nang gaw grai a nya ai masha a gawk she rai nga ai!" nga tsun dat sai. Ndai tsa ya wa gaw dai hpe na jang grai pawt mat sai hte "Sara! Ngai hpe shut ai nga yang sara n dai n-ta kaw na ya jang pru mat wa u. Galoi mung hkum sa chyai sa!" nga gawt nga bu sai. Hpung sara wa bai tsun ai gaw "Ngai grai kam sa nna sa ai n re. Na n-ta mung masha ni grai kam sa na zawn re ai n-ta n re." nga bai tan wu ai.

Tsa ya wa gaw "Dai rai jang hpa kyi wa mi tam sha hkawm nga a ta?" nga matsa mawa nga tsun wa ai hku re. Sara wa gaw "Nang gaw Taxi manu a matu sha na hkum nang nat la ai. Teng man ai lam a matu nga a sak hpe pyi jaw kau gwi nga ai. Rai tim na a dum n-ta masha ni hpe myit yu ai kun? Shan hte gara hku hkam sha na. Taxi manu gaw kade mung n re. De a majaw sha na hkum nang nat la ai ngu ai gaw dan nga a ni? Nang a tsawm gaw myit yu nna galaw ai rai a ni?" ngu tsun wu ai.

Tsa ya wa gaw hpa ga mung n shaga mat sai. Shi a madu jan hte kasha hpe yu yang gaw hpa mung n nga, zim rai myi pri si sha hkrat nga ma ai. Shi hkum shi bai yu yang mung masha zawn pyi n rai mat sai. Hpa mung n mai galaw mat sai. Bungli mung n mai galaw mat sai. Dum n-ta kaw hpa baw rau sha sana law. Shi myit yu magang myit n gut magan rai wa sai. Sara wa wa mat ai hpang du hkra shi gaw hpa ga mung n sha ga mat sai. Shi hkum shi grai n rai dum mat sai hku re.

"Aww!! Ngai jahkring mi laman pawt ai a majaw nye prat ting jam jau hkrum mat sai. Nye kasha, nye madu jan. Gara hku a sak matut sa na law. Ngai grai n kang ka ai. Ngai hpa majaw jau jau n myit yu ai sha dai hku galaw ai. Grai myit malai lu ai." Yawng gaw hpang hkrat mat sai. "Ngai n re. Nye hkum ngai nat na matu myit ai ngai n re. Nye a myit kata dai myit n rawng ai. Hpa majaw ngai nat dat ai rai sai kun? Ngai n chye mat sai."

Shata 3, 4 hpang e dai tsa ya wa gaw wan hkru da ai a na ni hte sha n nga mat sai hku re.

PS:: Ndai gaw kaja byin lai wa ai mabyi hpe lakap let ka da ai re. Pastor Ock Soo Park a mungga kaw na hpe htap htuk hkra Ta Tut bai ka da ai re. An-hte mung hpa mi galaw yang galaw, Yesu a myit hte Tsadan a myit hpe chye ging hka yang gaw grai pyaw ai prat hpe lu madu na re ngu....

Matut hti na+++

Bai hkum ba da na---